சீதா கல்யாண வைபோகமே - 1

பத்ராசல ராமர் கல்யாண வைபோகத்தை டீவியில் பார்த்துக்கொண்டிருந்த பொழுது காலிங் பெல் அடிக்க எழுந்து போய் கதவை திறந்தார் தியாகு. “ரண்டி பின்னி!!” என முகமெல்லாம் சந்தோஷத்துடன் சித்தியை வரவேற்றார். ஃப்ளைட் கரெக்ட் டைமாப்பா? என மகன் ஷ்யாமை கேட்டுக்கொண்டே “ தண்ணி எடுத்துகிட்டுவாம்மா சீதா என மகளுக்கு சொன்னார்.

சீதா ஓடிப்போய் தண்ணி கொண்டு வந்து “அவ்வா!! இந்தாங்க தண்ணி” என்று கொடுத்துவிட்டு உனக்கும் வேணுமாண்ணா! என்று கேட்க அவன் வேண்டாம் என்று சொல்லவே பாட்டியை கட்டிக்கொண்டு உட்கார்ந்தாள்.

ஷ்யாம் பெட்டிகளை எடுத்துக்கொண்டு போய் சீதா  அறையில் வைத்தார். அம்மா முகம் பார்த்தான் பரவாயில்லை ரகத்தில் இருந்தது.“ரண்டி அத்தா!!” என அழைத்துவிட்டு காபி கலக்க சென்றுவிட்டாள் பத்மா.  (பின்னி - சித்தி, ரண்டி - வரவேணும்) 

”நாளைக்குத்தானே பெண்பார்க்க வர்றாங்க தியாகு”  என சீதாவின் முகத்தை வருடிய படியே கேட்டார் பானுபின்னி. “ஆமாம். சாயந்திரம் 4 மணிக்கு. அதான் உங்களை இன்றைக்கே அழைத்து வரச்சொன்னேன். இருந்து உங்க பேத்தி கல்யாணம் முடிச்சு கொடுத்திட்டுதான் போகணும்!!” என்று சொல்ல

அதுக்கென்ன! மஹா பாக்கியம்!” என்று சொல்லிக்கொண்டிருக்கும்பொழுதே
பத்மா காபியுடன் கொண்டு வந்து கொடுத்தாள். பானு பின்னியின் வரவு அவளுக்கு கொஞ்சம் இஷ்டமில்லை. மாமியாரே இல்லை. இந்த பானு பின்னி தியாகுவின் சித்தப்பா மனைவி. பத்மாவிற்கு சின்ன மாமியார். அவரை ஏன் அழைத்து வரச்சொன்னார், அதுவும் மும்பையிலிருந்து ஃப்ளைட்டில் என கோபம்.

                                                       மதியம் வாக்கில் பத்மாவின் அம்மாவும் வந்துவிட்டார்.  பத்மாவிற்குத்தான் வேற்றுமையே தவிர பானு பின்னிக்கும் பத்மாவின் தாயார் ராஜிக்கும் நல்ல நட்பு.

bhanu pinni

அடுத்த நாள் சீதாவை பெண் பார்க்க வருகிறார்கள். அதற்காகத்தான் இரு பெரியவர்களும் வந்திருக்காங்க. பையன் டில்லியில் ப்ரைவேட் கம்பெனியில் பெரிய வேலை. சீதாவும் பெரிய படிப்பு படித்திருக்கிறாள். வேலை பார்த்துக்கொண்டிருக்கிறாள். 25 வயதுதான்.தியாகுவின் மூத்தமகன் ஷ்யாமும் ஒரு கம்பெனியில் உயரதிகாரி. தியாகு ரிட்டயர் ஆக 4 வருடம் பாக்கி இருக்கு. நல்ல குடும்பம்.

தியாகுவின் பெற்றோர் இறைவனடி சேர்ந்துவிட்டார்கள். அதனால் வீட்டில் விசேஷம் எனும் பொழுது பெரியவர்கள் இருக்க வேண்டும் என நினைத்து விவரம் தெரிந்த பானு சித்தியை வரவழைத்தார்.

”என்னென்ன வாங்கி வைக்கணும் விவரமா சொல்லுங்க பின்னி” அப்படின்னு கேட்க ஷ்யாம் பேப்பரும் பேனாம் கொண்டு வந்து எழுத ரெடியானான். சீதா பாட்டி பக்கத்தில் அமர்ந்து பார்த்து கொண்டிருந்தாள். தாய் ராஜியும் மகள் பத்மாவும் உள்ளே அறையில் ஏதோ பேசிக்கொண்டிருந்தார்கள்.

 அங்கே மணமகன் ரகுராம் வீட்டினர் டில்லியிலிருந்து கிளம்பி சென்னையில் இருக்கும் அவர்கள் உறவினர் வீட்டிற்கு வந்துவிட்டார்கள். அடுத்த நாள் காலை முதலே வீடு அல்லோல படுகிறது. பானு பின்னி பேத்தியை பக்கத்தில் உட்கார வைத்துக்கொண்டு,” டென்ஷன் ஆகாதேம்மா. எல்லா நல்ல படியா நடக்கும்” என்று பேசி அவள் பயம் போக்கினாளென்றால், அம்மம்மா ராஜியோ
பேத்திக்கு தலை குளிப்பாட்டி, காயவைத்து என அவளை பார்த்துக்கொண்டாள்.

தியாகும் ஷ்யாமும் போய் வேண்டியதை வாங்கி வந்தனர். இரு சம்ம்பந்திகளும் பத்மாவுக்கு துணையாக சமையல்கட்டில் வேலை பார்த்து சாயந்திரத்திற்கு தேவையான பலகாரங்களை செய்து வைத்தார்கள். மதிய சாப்பாடும் முடிந்து கொஞ்சம் நேரம் தூங்கி எழுந்த பத்மா ஃப்ரெஷ்ஷாக டிகாக்‌ஷன் போட்டு, பாலை காய்ச்சி எல்லோரும் காபி கலந்து கொடுத்தாள்.

எல்லோரும் ரெடியானார்கள். மாப்பிள்ளை வீட்டுக்காரர்கள் வரும் நேரமாயிற்று.....

தொடரும்.