எங்க ஊரு ”கடப்பா”

எங்க ஊர்ல ரோட்டோர கடைகள் ஏராளம். போனவாட்டி ஊருக்கு போனப்ப வீதிக்கு 4 சாப்பாடுக்கடை இருப்பதை பார்த்தேன். இப்ப ஊர்ல யாரும் சமைப்பது இல்லையோன்னு டவுட்டே வந்திருச்சு.

ஆனாலும் பாருங்க எங்க ஊர்ல இந்த சாப்பாட்டு ஐட்டங்கள் வித்தியாசமா இருக்கும். ”முட்டைமாஸ்னு ஒரு அயிட்டம் ரொம்ப நல்லா இருக்கும்.” அக்கா. ஊருக்கு போகையில போட்டோவாவது பிடிச்சு கொண்டாந்து போடுங்கன்னு”!!! தம்பியோட நட்பு சிங்கையிலிருந்து மெயில் அனுப்பியிருந்தாப்ல.  அவருக்காகவே அந்த கடை பக்கம் போய் போட்டோ எடுத்தாந்து ஃபேஸ்புக்ல போட்டேன். ரொம்ப சந்தோஷ்ம்க்கான்னு ஏதோ பார்சல் சிங்கைக்கு அனுப்பி வெச்சாப்ல சந்தோஷப்பட்டார்.

முட்டை மாஸ் புதுகை ஸ்பெஷல்

அதுவும் இந்தக் கடையிலதான் கிடைக்கும். இதுக்காகவே ஞாயிறு கூட்டம்....
திலகர் திடல் எதிரில் இந்த கடை இருக்கு. அதே மாதிரி எங்க ஊர்ல பரோட்டா, இடியாப்பம் எல்லாமே சூப்பரா இருக்கும். கடப்பான்னு ஒரு ஐட்டம் கொடுப்பாங்க பாருங்க. செம ருசி. 4 பரோட்டா வாங்கினாலும் கடப்பா கட்டினீங்களான்னு கேட்டு வாங்கிகிட்டு போவாங்க.

பரோட்டாவுக்கு குருமாவும் நல்லா இருக்குன்னாலும் கடப்பாவோட ருசியே ருசிதான். ஊருக்கு போகும்போதெல்லாம் பசங்க கண்டிப்பா ஒரு கை பாத்துடுவாங்க. எங்க ஊர்ல ராதாகபேன்னு ஒரு ஹோட்டல் இருக்கு, பிருந்தாவனம் ஸ்டாப் பக்கத்துல இருக்கு. அங்கே ஞாயிற்றுக்கிழமை காலையில் மட்டும் இட்லியோட சட்னி, சாம்பார் ஏதும் கிடையாது. கடப்பா மட்டும்தான் தருவாங்க. இங்கயும் கூட்டம்னு சொல்லணுமா என்ன?

ஊருக்கு போனாத்தான் கடப்பாவான்னு பசங்க கேப்பாங்க. அதெப்படி. வூட்டுலயே கடப்பா போடுவோம்னு களத்துல இறங்கி கடப்பா செஞ்சு கொடுப்பது பழக்கமாகிடிச்சு.   அந்த கடப்பா இன்னைக்கும் செஞ்சேன். அந்த செய்முறை எல்லாம் ரொம்ப சிம்பிள் தான். வாங்க எப்படின்னு பாப்போம்.

தேவையான பொருட்கள்:
பாசிப்பருப்பு - 1கப்
உருளைக்கிழங்கு - சின்னது 2
வெங்காயம் - நீள்வாக்கில் அரிந்தது 1
பச்சைமிளகாய் - 4
தேங்காய் -  1/4 மூடி
சோம்பு - கொஞ்சம்,
பூண்டு - 2 பல்
எலுமிச்சம் பழம் - 1
உப்பு, கொத்தமல்லி தேவைக்கேற்ப

தாளிக்க:
கறிவேப்பிலை, கொஞ்சம் பட்டை, கொஞ்சம் பிரிஞ்சி இலை, ஏலக்காய் 1.

முதல்ல பாசிப்பருபை குழைய வேக வெச்சு வெச்சுக்கோங்க. உருளைக்கிழங்கை பொடியா அரிஞ்சு தனியா வேக வெச்சாலும் சரி. இல்லாட்டி வேகவெச்சு  தோலுரிச்சு மசிச்சு வெச்சுக்கிட்டாலும் சரி.

தேங்காய், பச்சை மிளகாய், சோம்பு, பூண்டு இவைகளை மைய அரைச்சு வெச்சுக்கணும்.

1 ஸ்பூன் எண்ணெய் விட்டு தாளிச்சுக்கணும். அரிஞ்சு வெச்சிருக்கற வெங்காயத்தை போட்டு வதக்கணும்.

மசிச்சு வெச்சிருக்கற உருளைக்கிழங்கை அதுல கொட்டி கொதிக்க விடணும். 2 நிமிஷம் கழிச்சு அரைச்சு வெச்சிருக்கற மசாலாவோடு ஒரு கப் தண்ணீர் சேர்த்து நல்லா கொதிக்க விடணும்.

தேங்காய் மசாலா

 உப்பு போட்டு கொதிச்சதும் குழைய வேக வெச்சு வெச்சிருக்கற பாசிப்பருப்பையும் போட்டு நல்லா கொதிக்க வைக்கும்போதே வாசனை வீடு ஃபுல்லும் நிறைஞ்சிடும். 

குழைய வேகவெச்ச பா.பருப்பு

தேவைப்பட்டா கொஞ்சம் தண்ணீர் சேத்து கொதிக்க விடணும். 5 நிமிஷம் போல கொதிச்சதும் அடுப்ப ஆஃப் செஞ்சிட்டு எலுமிச்சம் ரசம், கொத்தமல்லி சேர்த்து கலக்கினா சுவையான கடப்பா ரெடி. இட்லி தோசைக்கு மட்டுமல்ல சப்பாத்திக்கும் சூப்பர் ஜோடி.

இன்னைக்கு காலேல கடப்பா செய்யும்போதே வாசனைக்கு பசங்க பசிக்குதுன்னு சாப்பிடலாமான்னு கோரஸ் போட்டாங்க. :))

கடப்பாவில் மிதக்கும் இட்லி :)

கிட்டுமணிகளுக்காக :)))

ஜலீலா தனது வலைப்பூவில் கிட்டுமணிகளுக்காக ஷ்பெஷல் உணவுன்னு போட்டி வெச்சிருக்காங்க. அதுக்காக என்னுடைய இந்தப் பதிவு. (கிட்டுமணி!!!!- அதாங்க பேச்சிலர்கள் :) )

 பதிவைப்பாப்போம். சிம்பிள் ஆனால் அதே சமயம் ஹெல்த்தியான உணவு. கறி தனியா, சோறுதனியான்னு சமைச்சுகிட்டு இருக்காம டூ இன் ஒன் இந்த பாலக் பனீர் ரைஸ்.

 இப்ப என்னன்ன தேவைன்னு பாப்போமா!!
தேவையான பொருட்கள்:
மிளகாய்ப்பொடி - 1/2 ஸ்பூன் (உங்க தேவைக்குத் தக்க கூட்டிக்கலாம்) கரம்மசாலா பொடி - 1/2 ஸ்பூன்
 மஞ்சள் தூள் - 1/4 ஸ்பூன்
தயிர் - 1 கப்
ஜீரகம் - 1/4 ஸ்பூன்
 ஏலக்காய் - 1
லவங்கம் - 1
 பிரிஞ்சி இலை - கொஞ்சம் (மேலே சொல்லியிருக்கும் 3ம் வேணும்னா சேக்கலாம். இல்லாட்டி கரம்மசாலாதான் சேக்கறமே!)
 பாலக் இலை - 2 கட்டு (கழுவி பொடியா அறிஞ்சு வெச்சுக்கணும்)
 வெங்காயம் 2 - நீளவாக்கில் அரிஞ்சு வெச்சுக்கணும்.
 பனீர் துண்டுகள் - 200 கிராம்
இஞ்சிப்பூண்டு விழுது - கொஞ்சம்
 பாஸ்மதி அரிசி அல்லது சாதாரண அரிசி - 2 கப்
உப்பு - தேவைக்கேற்ப

 இப்ப செய்முறை எப்படின்னு பாப்போம்: காடாய் எடுத்துகிட்டு நெய் அல்லது எண்ணெய் 1 ஸ்பூன் சேர்த்து காய்ந்ததும் ஜீரகம், ஏலக்காய், லவங்கம், பிரிஞ்சி இலை சேர்க்கவும். சற்றே வறுத்ததும்

வெங்காயம், இஞ்சிப்பூண்டு சேர்த்து வதக்கணும்

அப்புறம் வெட்டி வெச்சிருக்கும் பாலக்கீரையை சேர்த்து வதக்கணும்

அடுத்தாப்ல பனீர் துண்டுகளை சேர்த்து வதக்கும் போது உப்பு, மஞ்சள், மிளகாய்த்தூள், கரம்மசாலா எல்லாம் சேர்க்கணும்.

தயிர் சேர்த்து வதக்கி 1 கப் தயிர் இருப்பதால 2 1/2 கப் தண்ணீர் ஊத்தி கொதிக்க விடணும்

இப்ப சுடச்சுட பாலக் பனீர் ரைஸ் ரெடி.

இந்தப் பாலக் பனீர் ரைஸில் பனீர் பிடிக்காதவங்க பனீரைத் தவிர்த்து வெறும் பாலக் ரைஸா செஞ்சுக்கலாம். மைக்ரோ அவன் இருக்கறவங்க மேலே சொன்ன அதே முறையில் மைக்ரோ அவன் பாத்திரத்தில் வெச்சு வெங்காயம், பாலக், பனீர் எல்லாம் சேர்த்து வதக்கி அவனில் 30 நிமிஷம் வெச்சா ரெடி.

(பாஸ்மதி அரிசியா இருந்தா மைக்ரோஅவனில் 2 கப் அரிசிக்கு மேலே சொல்லியிருக்கும் அளவு தண்ணீரும், தயிரும் போதும். பொன்னி அரிசியா இருந்தா இன்னும் 1/2 கப் தண்ணி கூட சேக்கணும்.) இந்த ரெசிப்பிக்கு ரய்தா தேவையில்லை. சிப்ஸ்/அப்பளம் இருந்தாக்கூட போதும்.

 வீக் எண்டுக்கு செஞ்சு உங்க நண்பர்களை அசத்துங்க :))

ஆந்திரா உணவு எப்புடி இருக்கும்???

ஆந்திரா சாப்பாடு, ஆந்திரா மெஸ் அப்படின்னு சொன்னாலே
பலருக்கு கண்ணு எரியும். அம்புட்டு காரமா இருக்கும் சாப்பாடு.
வெஜ்ஜானாலும் சரி, நான்வெஜ்னாலு சரி அது சும்மா சுள்ளுன்னு
காரமா இருக்கணும். அதுதான் ஆந்திரா ஷ்பெஷல். ஆந்திரா
சாப்பாடுன்னு சொன்னாலும் அதுலயும் ரெண்டு வகை இருக்கு.
1. பக்கா ஆந்திரா சாப்பாடு (குண்டூர், விஜயவாடா, விசாகப்பட்டிணம்)
ஏரியா சமையல்கள், 2. ஹைதராபாதி சாப்பாடு. (இதுல
மொகல் உணவுவகைகள் இருக்கும்.) ஹைதராபாத்தில் எல்லாமே
மொகல் சாப்பாடா இருக்காது. தெலங்கானாவுக்கே உரிய காரம்
இங்கயும் உண்டு.

மதிய சாப்பாடு நல்லா விஸ்தாரமா இருக்கும். அதுல முக்கியமா
இருக்க வேண்டிய ஐட்டம் பச்சடி & ஊறகாய(ஊறுகாய்).
பச்சடின்னா நம்ம ஊர் திதிப்பு பச்சடி, இல்லாட்டி தயிர் பச்சடின்னு
நினைக்காதீங்க. தொண்டக்காய், முட்டைகோஸ், வெள்ளரிக்காய்,
வெண்டாக்காய் இப்படி எல்லா காயிலயும் பச்சடி செய்யலாம்.
உப்பு, உரைப்பு, புளிப்பா இருக்கும்.

அடுத்து ஊறுகாய். ஆந்திரா ஷ்பெஷல் ஆவக்காய், அதுலயும்
வெல்லம் சேர்த்தது, பூண்டு சேர்த்ததுன்னு வெரைட்டி இருக்கும்.
இது தவிர கோங்கூர(புளிச்சகீரை),எலுமிச்சை, மாகாயி (மாங்காயிலேயே
ஒரு வெரைட்டி ஊறுகாய்), சிகப்பு மிளகாய் ஊறுகாய் என
வெரைட்டி வெச்சிருப்பாங்க.

இவைகள் கலந்து 4 உருண்டை உள்ளே முதலில் தள்ளுவதை
“மொதட்டி உண்ட” (முதல் உருண்டை) அப்படின்னு சொல்வாங்க!!!!
இந்த பச்சடி, ஊறுகாய் தவிர பருப்பு பொடி, கறிவேப்பிலை பொடி,
புதினா பொடி, பொட்டுக்கடலை பொடின்னு நிறைய்ய வகை பொடிகளும் இருக்கும்!!!
அதுவும் கம்பல்சரியாக்கும். :))

முத்தபப்புன்னு பருப்பைகெட்டியா
செஞ்சு வெச்சிருப்பாங்க. முத்தபப்பு போட்ட கலந்து சோற்றுக்கு
அருமையான சைட்டிஷ் ஆவக்காய் ஊறுகாய் தான் :))
கீரை பருப்பு, கூட்டு வகைகளும் செய்வாங்க. ஆனா எல்லாத்துக்கும்
தாளிக்கும்போது பச்சைமிளகாய் ரெண்டு, காய்ஞ்ச மிளகாய்
ரெண்டு சேர்த்திடுவாங்க. இதைத்தவிர பல சமயம்
மிளகாய்த்தூளும் சேர்த்துதான் சமையல் நடக்கும்.

அதைத்தவிர சாம்பார், குழம்பு வகைகள்.
பாகற்காய் குழம்பு, பாசிப்பயறு குழம்பு, நான் வெஜ்ஜில்
Chapala Pulusu (fish gravy), Kodi Kura,(கோழி கறி)
Guddu Pulusu (also known as Egg Pulusu), Meat curry, Shrimp curry, etc.
இவைகளும் உண்டு.

அப்புறம் ரசம். தக்காளி ரசம் மட்டுமில்ல வகைவகையா ரசம்.
ஆனா நம்ம ஊர் மாதிரி பருப்புத்தண்ணி சேர்த்திருக்கணும்னு கட்டாயம்
இல்ல. பூண்டு ரசம், பருப்பு பொடி ரசம், கொள்ளு ரசம், வெங்காய
ரசம்னு ஏகப்பட்ட வெரைட்டி.

கலந்த சாதங்களும் உண்டு. அங்கங்கே தாளித்த பச்சைமிளகாய்
கண்ணில் தென் படும் புளியோதரை, எலுமிச்சை சாதம், தயிர்
சோறு (இதுக்கும் பச்சை மிளகாய் தாளிக்கப்படும்) :))
ஆந்திராவில் அதிகமா மிளகாய் மற்றும் இதர மசாலா சாமான்கள்
விளைவதால சாப்பாட்டில் இவை அதிகாமா சேர்க்கப்படுது.
இதைத்தவிர மோர்மிளகாயும் வறுத்து வெச்சுக்குவாங்க.

இப்படி உணவில் காரம் அதிகம் சேர்ப்பதை ஈடுகட்ட நெய்
கண்டிப்பா உணவில் சேர்த்துப்பாங்க. நெய் போட்டு பிசைஞ்சு
ஊறுகாய், பச்சடி, பொடி சோறு சாப்பிடுவாங்க. தயிர் கண்டிப்பா
உணவில் இருக்கும். இனிப்பு வகைகளும் கண்டிப்பா இருக்கும்.
அதிரசம் பல வீடுகளில் கண்டிப்பா இருக்கும்.

டிபன் வெரைட்டிகளில் கூட காரம் இருக்கும். ஆந்திரா மசாலா
தோசை சாப்பிட்டு இருக்கீங்களா?? மசாலா நடுவில் வைத்து
அத்துடன் காரப்பொடி தூவி, உள்ளிகாரம் (வெங்காயம், பூண்டு
சேர்ததது) கலந்து இருக்கும். பெசரட்டுக்கு சூப்பரா இஞ்சி துவையல்
அப்படின்னு டிபன்லயும் காரம் கலந்துதான் இருக்கும். புதுசா
சாப்பிடறவங்களுக்கு “ஏன் உச்சி மண்டையில சுர்ருங்குது தான்”” :)

என் தோழி ஒருத்தங்க வீட்டுக்கு சாப்பிட போயிருந்தோம்.
பெசரட்டு செஞ்சிருந்தாங்க. தொட்டுக்க இஞ்சி துவையல், தேங்காய்
துவையல், தவிர கறிவேப்பிலை பொடி நெய்யில குழைச்சு!!!!:))

ஹைதராபாத் பிரியாணி அதிகம் காரமில்லாம இருக்கும். அதனால
அதுக்கு தொட்டுக்க சைட் டிஷ், மிர்சிகா சலன்.:)) அதை ஈடுகட்ட
தயிர் ரைய்தா!!! எப்புடி??!!! :))

இங்கே கடைகளில் சமோசா வாங்கினோம்னா கூடவே கொஞ்சமா
பொரிக்கப்பட்ட பச்சைமிளகாயும் சேர்த்துதான் கட்டுவாங்க. மிர்சி
கொடுக்க மறந்துட்டீங்களேன்னு சண்டை போட்டு வாங்கிகிட்டு
போறவங்களும் உண்டு. மிர்ச்சி பஜ்ஜி ரொம்ப ஃபேமஸ். அதுலயும்
ஸ்டஃப் செஞ்சது செய்யாதது, நடுவில் கீறிவிட்டு கொஞ்சமா
பொரிச்சது பொரிக்காததுன்னு செம வெரைட்டி.

இப்படி காரமான உணவுகளே விரும்பி சாப்பிடறதால் இங்கே இப்ப
உணவின் சுவையே காரமானதா இருக்க வேண்டிய கட்டாயம்
ஆகிடிச்சு. வட இந்திய உணவுகளாக சாட் அயிட்டங்கள் கூட
செம காரமா இருக்கும்!!!

எங்க வீதியிலேயே வாராவாரம் சந்தை வந்திடுது. காய்கறியெல்லாம்
வாங்கிக்கலாம். அப்படி வாங்கப்போகும் போது ஒரே ஒரு
விஷயத்துக்குத்தான் கஷ்டப்படுவேன். அது பச்சைமிளகாய்
வாங்குவது!!!! ரெண்டு ரூவாய்க்கு தாங்கன்னு கேக்கற ஆளு
நான் மட்டும்தான் இருக்கும். இரண்டு ரூவாய்க்கான்னு என்னிய
மேலயும் கீழயும் வித்தியாசமா பாப்பாங்க.

இங்க குறைஞ்சது கால்கிலோ வாங்குவாங்க.
நமக்கு இரண்டு ரூவாய்க்கு வாங்கினாலே 2 வாரம் வரும்!!
கால்கிலோ பச்சைமிளகாய் எம்புட்டுன்னு நினைக்கறீங்க!! ஜஸ்ட்
5 ரூவா!!!! வாராவாரம் இஞ்சி, பூண்டு, பச்சைமிளகாய்,
காய்ஞ்ச மிளகாய் இவைகளை குறைஞ்சது கால்கிலோவுக்கு
வாங்கறவங்க அதிகம்.

அமைதிச்சாரலுக்காக இந்தப்பதிவு.

pizza bread...

ஃபாஸ் ஃபுட், ஜங்க் ஃபுட் இவைகளை பசங்க அதிகமா விரும்பி
சாப்பிடறாங்க. என்ன செய்யறதுன்னே புரியலை இதுதான் பல
வீடுகளில் புலம்பல். அதுலயும் இந்த மேகி இல்லாட்டி பசங்க
அம்புட்டுதான். வாரத்துக்கு ஒரு நாள் இல்லை பல வீடுகளில்
தினமும் ஏதோ ஒரு வேளை உணவாக மேகித்தான் இருக்கு.

நாம என்னதான் மறுத்து கத்தினாலும் ஜெயிக்கப்போவது
பசங்கதான்!!! என்னதான் செய்ய. என்னுடைய ஐடியா படி
பாத்தா அதையும் நம்ம வாழ்க்கையில் அனுமதிச்சிடறது
பெட்டர். எப்படியும் பசங்க தான் ஜெயிக்கப்போறாங்கன்னு
இல்லை, ஆனா நாம் எதிர்க்க எதிர்க்க அவங்களும் குதிக்கத்தான்
போறாங்க. :( :)

எங்க வீட்டுல பிட்சா, பர்கர், நூடில்ஸ் எல்லாமே உண்டு.
அவை எல்லாம் மாசத்துக்கு ஒரு தரம் மட்டும்தான். ஆனா
அதே பிட்சாவை நானே வீட்டுல செஞ்சு சில சமயம் கொடுத்திடுவேன்.
பர்கர், வெஜி நூடில்ஸ் (சைனீஸ் நூடில்ஸ்), பாஸ்தா
எல்லாமும் வீட்டிலேயே செஞ்சு கொடுத்திடறது. மேகி நூடில்ஸ்
கூட மாசத்துக்கு ஒரு தரம் உண்டு. பிட்சா ப்ரெட்னு தலைப்பு
போட்டுட்டு என்னா கதை பேசிக்கினு இருக்கன்னு கேக்கறீங்கள்ல...
மேட்டருக்கு வர்றேன். பிட்சா டேஸ்ட்ல நாம விரும்பும் சத்துக்களோட,
செஞ்சு கொடுத்தா எப்படி இருக்கும்??!!! ஐடியா நல்லா இருக்குல்ல.
இதுக்கும் சாதாரண சாண்ட்விச் ப்ரெட் போதும்.

தேவையான ஐட்டங்கள் பாப்போம்:

சாண்ட்விச் ப்ரெட் - 4
வெங்காயம் நீளமாக அரிந்தது - 1
தக்காளி நீளமாக அரிந்தது - 2
குடை மிளகாய் அரிந்தது - 2
கார்ன் - 1/2 கப்.
(விரும்பினால் காரட் துருவல், பீன்ஸ் பொடியா அரிந்தது)
சேத்துக்கலாம்.
ஆலிவ் ஆயில் - 1 ஸ்பூன்
பிட்சா வாங்கும் போது கொடுப்பாங்களே சில்லிஃப்ளேக்ஸ் அது
ஒரு பாக்கெட், அதோடு வரும் இத்தாலியன் சீசனிங் ஒரு
பாக்கெட். - இதுதான் முக்கியாமான பொருள். இது இல்லாட்டி
பிட்சா ப்ரெட் சரியா வராது. (அடுத்தவாட்டி பிட்சா ஆர்டர்
செஞ்சா தூக்கி எறிஞ்சிடாம பத்திராமா எடுத்து வெச்சுக்கோங்க).
சீஸ் ஸ்லைஸ் - 2
பட்டர்- கொஞ்சம்.
உப்பு சுவைக்கேற்ப

சாமான் ரெடி. செய்வது எப்படின்னு பாக்கலாம். அவன்லயோ
இல்ல கடாயிலோ ஆலிவ் ஆயில் சேர்த்து வெங்காயத்தை
வதக்கி, தக்காளி, குடைமிளகாய், கார்ன் சேர்த்து நல்லா
வேக விடவும். வதங்கியதும் சில்லி ஃப்ளேக்ஸ், இத்தாலியன்
சீசனிங், உப்பு போட்டு கலந்து திரும்ப கொஞ்சம் சூடு
செஞ்சுக்கணும். மசாலா ரெடி.

ப்ரெட் ஸ்லைஸ் எடுத்து நடுவில் மசாலாவை வெச்சு, மேலே
ஒரு ஸ்லைஸ் சீஸ் வெச்சு, இன்னொரு ஸ்லைஸ் ப்ரெட்டால
மூடி அதை தவாவில் பட்டர் போட்டு இரண்டு பக்கமும் கொஞ்சம்
ப்ரவுன் கலர்ல டோஸ்ட் போட்டுக்கோங்க. தவாவோட சூட்டுக்கு
கொஞ்சமா சீஸ் மெல்ட்டாகி சாப்பிடும்போது அப்படியே....
பிட்சா சாப்பிடும் டேஸ்ட் கொடுக்கும். :))

டோஸ்டரில் போட்டும் செய்யலாம். ஆனா சிலசமயம் சீஸ் உருகி ஒட்டிக்கிற
வாய்ப்பு அதிகம். ஆனா தவாவில் அழகா வருது. செஞ்சு பாத்து சொல்லுங்க.

கிட்டுமணிகள், தங்கமணி ஊருக்கு போயிட்டதால தற்காலிகமா
கிட்டுமணிகளா இருப்பவங்க எல்லோருக்கும் இது ரொம்ப ஈசியான ஒரு
ரெசிப்பி. :))

ஹேப்ப்பி வீக் எண்ட்.

யம்மி யம்மி.... சொதி

சில ஞாபகங்கள் நமக்கு மறக்காது. இல்லாட்டி மறந்திடக்கூடாதுன்னு
நினைப்போம். அப்படித்தான் எங்களுக்கு ....... அதே ஊர்தான்!!!
அதைப்பத்தின் இன்னும் எங்க வாழ்நாள் முழுக்க பேச சொன்னாலும்
அலுக்காம பேசுவோம் (கேட்டு உங்களுக்கு அலுத்திருக்கலாம்!!:)) )

தினத்துக்கு 10 வாட்டியாவது ஒவ்வொருத்தரும் ஞாபகப்படுத்திட்டு,
ஸ்ஸ்ஸ்ஸ் ஏன் ஞாபகப்படுத்தறீங்கன்னு... செல்லமா சலிச்சுக்குவோம்.
அயித்தானின் நண்பர் வருவதாக தகவல் சொன்னாரு. அவரும்
வழக்கம்போல ஏதேனும் வேணும்னா மெசெஜ் அனுப்புங்கன்னு
சொல்ல அயித்தான் என்ன வாங்கியாறாச் சொல்லணும்னு கேட்டாக.

பிள்ளைகள் பெரிய்ய்ய லிஸ்டே கொடுத்தாங்க. :)) அத்தனையும்
கட் ஷாட் செஞ்சு கடைசியில் EGB யும் ஜெஸ்டா டீயும் வாங்கியாரச்
சொன்னோம். அதென்ன EGB? இதான். ஜிஞ்சர் பியர்.


அந்த ஊர் உணவும் பிள்ளைகளுக்கு ரொம்ப விருப்பம். அந்த உணவு
பழக்கம் பத்தி அடிக்கடி பேசுவோம். போன வாரத்துல ஒரு நாள்
காலை உணவு பிரட்டுன்னு முடிவு செஞ்சோம். சரி அம்மா
எப்பவும் போல டோஸ்ட் இல்லாட்டி சாண்ட்விச் செய்வாங்கன்னு
பேசாம அவங்க வேலையை பாத்துக்கிட்டு இருக்க. ப்ரேக்ஃபாஸ்ட்
டேபிளில் ப்ரெட்டோடு ஸ்ரீலங்கன் தால் சர்வ் செஞ்சதும் முகத்தில்
ஆயிரம் வால்ட்ஸ் பல்ப்.

யம்மி யம்மி சொதின்னு தலைப்பு வெச்சிட்டு என்னென்னவோ கதை
பேசிக்கினு இருக்கேன்னு திட்டாதீக. நேற்று டின்னருக்கு ஆலு சொதியும்,
இடியாப்பமும் வெச்சதும் செம குஷி. யம்மி யம்மின்னு ரெண்டு பேரும்
எஞ்சாய் செஞ்சாங்க. அந்த ரெசிப்பியை இங்கே தர்றேன்.

தேவையான சாமான்கள்:

உருளைகிழங்கு - 1/4 கிலோ (வேகவைத்து தோலுரித்து, வெட்டி
வைத்துகொள்ளவும்.
பூண்டு - 4 பல்
பெரிய வெங்காயம் - 3.நீளமா அரிந்து கொள்ளனும்.
ப.மிளகாய் - 1
கறிவேப்பிலை - 1 ஈர்க்கு
தனியா பொடி - 1 ஸ்பூன் (எண்ணெய் இல்லாம சின்ன கடாயில்
வறுத்துக்கணும். கூடவே சீரகப்பொடு சேத்தாலும் தப்பில்லை)
எண்ணெய் - 1 ஸ்பூன்.
உப்பு, மஞ்சள் தேவைக்கேற்ப
தேங்காய்ப்பால் அல்லது தேங்காய்ப்பால் பவுடர்

செய்முறை:

அடுப்பில் வாணலி வைத்து எண்ணெய் சேர்த்து தாளிக்கவும்.
கடுகு தாளித்து ப.மி, வெங்காயம், கறிவேப்பிலை சேர்த்து வதக்கவும்.
பூண்டு சேர்த்து வதக்கவும்.

உருளைக்கிழங்கு சேர்த்து மஞ்சள் பொடி, உப்பு, தனியா சீரகப்பொடி
சேர்த்து நன்கு வதக்கவும்.

தேங்காய்ப்பால் பவுடரை திக்காக கலக்கி அதில் ஊற்றவும்.
நல்லா கொதிக்கும் போதே வாசனை தூக்கலா இருக்கும்.
சுடச்சுட இடியாப்பம் இல்லாட்டி ரைஸ் சேவைக்கு சூப்பர்
காம்பினேஷன்.


படம் நெட்டுல சுட்டதுதான். நான் செஞ்சது போட்டோ எடுக்கும் முன்னரே
காலி ஆகிடிச்சு. :( :))

அமைதிச்சாரல் வாங்க ரெசிப்பி ரெடி :)))

போனவாட்டி புளிப்பொங்கல் பத்தி பதிவு போட்டதும்
ரெசிப்பபி தெரிஞ்சு பதிவு போடுங்கன்னு அமைதிச்சாரல்
கேட்டிருந்தாங்க. அவங்களுக்காகவும் புளிப்பொங்கல்
தெரியாதவங்களுக்காகவும் இந்தப் பதிவும் (நேத்துதான்
மொதோ வாட்டி செஞ்சேன்)

இந்தப் புளிப்பொங்கல் நொய்யரிசிப்பொங்கல்னு
சொல்வாங்களாம். அதாவது நொய் (குருணை)
இதில் தான் செய்வாங்க. நம்ம மக்கள் குருணையும்
விடாமல் ஏதோ ஒரு தின்பண்டம் செஞ்சிடறாங்க
பாருங்க. கஞ்சிக்கு உபயோகிச்சுகிட்டிருந்த நொய்யில்
சூப்பரா புளிப்பொங்கல். இது புழுங்கலரிசியில் செஞ்சாதான்
ருசிக்குமாம்.

இப்ப குருணை,கல், நீக்கப்பட்ட அரிசிதான் நாம் வாங்குறோம்
அதனால நாமளே குருணையாட்டம் மிக்சியில் உடைச்சிக்கிடலாம்.
அரிசி உப்புமாவுக்கு உடைப்போமே அதுமாதிரி கொஞ்சம்
பெரிய்ய சைஸ் ரவையா உடைக்கணும். முக்கியமா
ஒண்ணு சொல்ல மறந்திட்டேனே அதுல 1/2 கப்
துவரம்பருப்பு சேர்த்து ரவை மாதிரி உடைச்சு வெச்சுங்கங்க.

புளிப்பொங்கலுக்கு புளி இல்லாமலா!!! எலுமிச்சம் சைஸ்
புளியை நல்லா ஊறவெச்சு, கரைச்சு ரசம் எடுத்து வெச்சுக்கோங்க.

தாளிக்க வழக்கம் போல காஞ்ச மிளகா, கறிவேப்பிலை,
கடலைப்பருப்பு, உளுத்தம் பருப்பு, கொஞ்சமா நிலக்கடலை,
கடுகு, கொஞ்சமே கொஞ்சம் வாசனைக்காக வெந்தயம்,
எல்லாம் ரெடியா வெச்சிக்கிடுங்க. பெருங்காயம் சேத்தா
இன்னும் வாசனையா இருக்கு. உப்பு, மஞ்சத்தூள் கூட
ரெடியா வெச்சிக்கிடுங்க.

அடுப்புல ப்ரஷர் பேன் மாதிரியோ அல்லது குக்கரையோ
வெச்சு நல்லெண்ணெய் இரண்டு ஸ்பூன் ஊத்துங்க.
காஞ்சதும் தாளிக்கிற சாமான்களை சாமான்களை
ஒவ்வொண்ணா போட்டு தாளிச்சு அதுல கரைச்சு
வெச்சிருக்கிற புளிக்கரைசலை ஊத்தணும். மஞ்சள்
தூள், உப்பு சேர்த்து நல்லா கலக்கிட்டு ரவை மாதிரி
பொடிச்சு வெச்சிருக்கிற அரிசி+ துவரம்பருப்பை
சேத்து நல்லா கிண்டனும். கொஞ்சமா கெட்டி ஆனதும்
மூடி விசில் போட்டு, இரண்டு அல்லது 3 விசில் வந்ததும்
அடுப்பை ஆஃப் செஞ்சிடுங்க.

ஸ்டீம் போனதும் குக்கரைத் திறக்கும் பொழுதே
வாசனை தூக்கும்!! :)) சுடச்சுட புளிப்பொங்கல்
ரெடி. தொட்டுக்க எதுவுமே வேணாம். ஆனா அப்பளத்தை
சுட்டு வெச்சீங்கன்னா இன்னும் இரண்டு கரண்டி கூட
உள்ள போகும். :))

படம் நெட்டுல சுட்டதுதான்.

ஆஷிஷ் பர்த்டேக்கு எங்க போனோம்??!!!

ஆஷிஷுக்கு பிடித்த சாக்லேட் ட்ரஃபிள் கேக் ஆர்டர் செய்திருந்தோம்.
மாலை 6 மணிக்கு கேக் வெட்டி, ஊட்டிய பிறகு கோவிலுக்கு அழைத்துச்
சென்று சுவாமி தரிசனம் செய்தோம். டின்னர் யாருக்கு பிறந்தநாளோ
அவர்கள் சாய்ஸ் தான்.

பெருமைக்காக சொல்லவில்லை ஆஷிஷ் எப்பொழுதும் டிஃபரண்ட் ஸ்டைல்
ரெஸ்டாரண்டை தேடி கண்டுபிடித்து வைத்திருப்பான். இந்த முறை அவன்
போக விரும்பியது ஓரிஸ் பஞ்சாரா. பஞ்சாரா ஹில்ஸ் பகுதியில் இருக்கும்
ohris ஹோட்டலுக்கு. பஷிர்பாக், நெக்லஸ்ரோட் என இந்த ரெஸ்டாரண்ட்
இருக்கும் இடம் அமைப்பு வித்தியாசமாகவே இருக்கும். பாலிவுட் ஸ்டைல்,
ஹோட்டல் பற்றி கூட ஒரு முறை சொல்லியிருந்தேன்.

ஓரிஸ் பஞ்சாராவில் ஒரு தளத்தில் ஒரு வகை உணவு. க்ரவுண்ட் ஃப்ளோரில்
சாட். முதல் தளத்தில் வட இந்திய உணவு. இரண்டாம் தளத்தில் சைனீஸ்.
ஆஷிஷ் போக விரும்பியது 3 & 4 ஆம் தளத்தில் இருக்கும் உணவகத்துக்கு.
சரி போவோம் என டேபிள் புக் செய்தேன். அன்று வெள்ளிக்கிழமைதான். ஆனாலும் இருக்கட்டும் என டேபிள் புக் செய்தேன். செம கூட்டம்.
சர்வர்கள் காட்டிலாகா போலீஸ் மாதிரி உடையணிந்திருந்தனர்.

கிழக்கு ஆப்பிரிக்காவில் இருக்கும் செரங்கட்டி காடுகள் போல ஒரு செட்டப்.
அங்கே கிடைக்கும் உணவோ பெஷாவரி, லக்னோவி & வட இந்திய வகை. எப்படி
கலக்கலா இருக்குல்ல?? அதுதான் ஆஷிஷின் கண்டுபிடிப்பு. குண்டன்
எங்கேயிருந்துதான் இன்பர்மேஷன் கலெக்ட் செய்வானோ. கார்களுக்கு அடுத்து
ஐயா ஆராய்ச்சி செய்வது ஹோட்டல்கள் பற்றிதான்.

அன்னைக்கு எப்பவும் ஆர்டர் செய்யும் சப்ஜீக்கள் இல்லாமல் வித்தியாசமா
ஆர்டர் செய்யணும்னு முடிவு செஞ்சிருந்தோம்.

திரங்கா பனீர் டிக்கான்னு ஒண்ணு ஆர்டர் செஞ்சோம். செம ருசி.

கோவா, புதினா சட்னி & குங்குமப்பூ சேர்த்து 3 கலர்ல பனீர் டிக்கா.

மெயின் கோர்ஸுக்கு பாலக் கோஃப்தா & லெஹான் கா மேலா எனும்
மிக்ஸ்ட் வெஜிடபிள் சப்ஜி.

இண்டியன் ப்ரட் வகைகளில் ஆஷிஷ் ஆர்டர் செய்திருந்தது chopped paratha.
பராத்தாவை பிச்சி நெய்யில் பொறிச்சு சும்மா மொறு மொறுன்னு இருந்துச்சு.
அம்ருதம்மா லச்சேதார் பராத்தா. நான் ஸ்டஃப்டு குல்சாவும் அயித்தான்
புதினா பராத்தாவும் ஆர்டர் செய்தோம். உணவு டேஸ்டோ டேஸ்ட்.
ஓரிஸில் சாப்பிட்டால் உணவின் தரம் எப்படி இருக்கும்னு சொல்லவே
வேண்டாம்.

டெசர்ட் எதுவும் வேணாம்னு முடிவு செஞ்சிட்டாரு ஆஷிஷ். நானும்
அம்ருதாவும் லஸ்ஸி குடிச்சோம். அவ்வளவுதான். பில் கொடுக்கும்
முன் பான் ட்ரிங்குன்னு ஒண்ணு குட்டி கிளாஸ்ல கொடுத்தாங்க. பாங்கா
இருக்குமோன்னு பயந்தேன். பானை கரைச்சு குடிச்சா எப்படி இருக்குமோ
அப்படி இருந்துச்சு. டேஸ்டும் நல்லாவே இருந்துச்சு.

எங்க 4 பேருக்கும் சேர்த்து வரியோட 1200 தான் பில். ஓரிஸில்
சாப்பிட்டால் வயிற்றுக்கும் பெஸ்ட், பர்ஸுக்கு பெஸ்ட்.

டைம்ஸ் ஃபுட் காண்டெஸ்டில் இந்த ஹோட்டலுக்கு விருது
கிடைச்சிருக்கு. இந்த ஹோட்டலின் வலைத்தள முகவரி

பேரு வாயில நுழையாட்டி என்ன??!!! :))

மஹாலட்சுமி கோவில் தரிசனத்திற்கு வரிசையில் நிற்கும் இடங்களில்
அழகா பந்தல் அமைச்சு அதில் ஃபேன் எல்லாம் வெச்சிருந்தாங்கன்னு
சொன்னேன். இதோ படம்.

நம்ம ஊர்ல பூ கட்டுவது ஒரு அழகுன்னா, மும்பையில ஒரு ரக.
இதோ அழகழகா கட்டி வெச்சிருக்காங்க பாருங்க.

சிறுதிண்டிகளுக்கு மும்பைதான் பெஸ்ட். என் ஆல்டைம் ஃபேவரீட்
வடாபாவ். சேவ் பூரி பிடிக்கும் அதைவிட தஹிபூரி. பேல் கொஞ்சம்
சரியாக கலக்காவிட்டால் காரபேல் ஆகி நம் வாய் பணால்
ஆகிவிடும். ஜுஹூ பீச்சில் சுடச்சுட பாவ் பாஜி சாப்பிடுவது ஆனந்தம்.
கோல்கப்பா எனப்படும் பானிப்பூரி வீட்டில் செய்தால் பிடிக்கும்.
ஆலு பேட்டீஸ், சமோசா ரகடா இவைகள்தான் எனக்குத் தெரியும்.
ஊருக்கு போனதிலிருந்து பெரிய மாமாவின் சின்ன மகள் “ஒதினா
ஆப்.... கானா ஹி சாஹியே!” என்று சொல்லிக்கொண்டிருந்த பண்டத்தின்
பெயர் என் காதில் சரியாக விழவே இல்லை. காதில் விழுந்தால்தானே
மண்டைக்குள் செல்லும்.

மாமாவின் சின்ன மகள் பிறந்த 9ஆவது மாதத்தில் என் திருமணம்.
மேடம் இப்போ +2 படிக்கறாங்க. கைக்குழந்தையாக தூக்கி கொஞ்சிக்
கொண்டிருந்த என் பாப்ஸ் என்னை டூவீலரில் உட்கார வைத்து
பர்ச்சேசிங்கிற்கு அழைத்துச் சென்றாள். பேரம் பேசுவது
இவளிடம் தான் கற்கவேண்டும். நாங்களும் பேசுவோம். கொஞ்சம்
இதமாக இருக்கும். மேடம் அடித்து பேசி வாங்கிவிடுவாள்.
அம்ருதாவுக்கு ஜெக்கின்ஸ் வாங்கினேன். மேடமின் பேரத்தால்
200ரூபாயில் முடிந்துவிட்டது!!

சசியும் பெரியவளாகிவிட்டாள். டாக்டரம்மா இப்பொழுது பிசி. இந்த பாப்ஸ் +2.இந்த முறை என் பயணம் ஏதோ சகோதரிகளுடன் அளவளாவிய ஒரு இனிதாக
மனதில் பதிந்துவிட்டது. உண்மையில் எனக்கு உடன் பிறந்த
சகோதரி கிடையாது. தம்பி மட்டும்தான். இந்த முறை சசியும்,
வர்ஷாவும் அந்தக்குறை நீங்கியது போல் நடந்து கொண்டார்கள்.
சரி மேட்டருக்கு வருவோம்.

வர்ஷா சொல்லிக்கொண்டிருந்த பண்டம் தபேலி. (Dabeli)
த்ரீ இடியட்ஸ் படத்தில் கரீனா சொல்வது போல இந்த குஜராத்தி
ஐட்டங்கள் இப்படித்தான் கொஞ்சம் கரடு முரடா இருக்கும் போல.
ஆனா தபேலி சாப்பிட்ட பொழுது என் உச்சி மண்டையில சுர்ருன்னது!!

அதென்ன தபேலின்னு சொல்லி வயிற்றெரிச்சலைக்கொட்டிக்காட்டா
தப்பாச்சே!

தபேலி அப்படின்னா அமுக்கியதுன்னு குஜராத்தியில் அர்த்தம்.
கிட்டத்தட்ட நம்ம பர்கர் மாதிரி இது. வேகவைத்த உருளை மசியலுடன்
தபேலி மசாலா சேர்த்து அதை பர்கர் பன்னின் நடுவில் வைத்து,
நிறைய்ய்ய்ய்ய்ய்ய்ய்ய் நெய் ஊற்றி தவாவில் சுட்டெடுத்து கொடுப்பார்கள்.
அதோடு ஒரு சாஸ் + புதினா சட்னி கொடுப்பார்கள். புதினா சட்னி +
சாஸ் மிக்ஸ் செய்து தொட்டு சாப்பிட்டால் உச்சி மண்டையில் சுர்ருன்னு
ஏறும். அந்த சட்னி சாஸ் தான் ருசியைக்கூட்டும். தபேலி மசாலா
ப்ளண்ட்டாக இருக்கு.

தபேலி எங்கே எப்படி ஆரம்பிக்கப்பட்டதுன்னு பாக்கலாம்.
கட்ச் பகுதியில் Keshavji Gabha Chudasama alias Kesha Malam,
அப்படிங்கறவர் கண்டுபிடிச்சதுதான் இந்த உணவு.
ஆரம்பிச்சப்போ 1 அணா 6 பைசாவுக்கு வித்தாராம். (1960ல)
இப்போ 8 ரூபாய். வடா பாவுக்கு போட்டியா இதுவும் ருசிக்கப்படுது.
கட்ச்ல இவங்க கடை இன்னமும் இருக்காம். கட்சி பகுதியில்
பிரபலமானதால கச்சி தபேலின்னும் சொல்வாங்களாம்.

இதைத்தான் என் மாமன் மகள் டேஸ்ட் செய்யச் சொல்லிக்கொண்டிருந்தாள்.
ஆஹா நிஜமாவே நல்ல ருசி. தேசி பர்கர் என்று கூட இதற்கு
பெயர் உண்டாம். Mumbai, Pune, Delhi, Nagpur, Aurangabad, Nizamabad, Nasik, Raipur, Bilaspur, Jabalpur, Indore, Bhopal, Udaipur, Jaipur,
இங்கெல்லாம் கூட தபேலி கிடைக்குதாம்.


எனக்கு ரொம்ப ஃபேவரீட்டான வடாபாவ் அம்ருதாவுக்கு
ரொம்பவே பிடித்துவிட்டது. ஊருக்கு கிளம்பும் அன்று அத்தை
சப்பாத்தி சப்ஜி செய்து கொடுத்திருந்தாலும் சர்ச்கேட் ஷ்டேஷனில்
வடாபாவும் வாங்கிக்கொண்டாள்!! ஹைதையிலும் கிடைக்குதும்மா,
ஆனா இந்த டேஸ்ட் வராதுல்ல!! அண்ணா ஊருக்கு வந்ததும்
வடாபாவ், தபேலி சாப்பிட்டதை சொல்லி அவன் காதில்
புகை விட வைத்தாயிற்று

:)))

ரிச் தக்காளி சாதம்!!!

தக்காளி சாதத்துல என்ன ரிச் தக்காளி சாதம் ரிச்சா பலோட் தக்காளி சாதம்னு
கேக்கறீங்களா? :)) செஞ்சு சுடச்சுட சாப்பிட்டு பாத்துட்டு அப்புறம் சொல்லுங்க.

இன்னைக்கு என்ன சமயல் இதுதான் பலரின் மண்டை குடைச்சல் கேள்வி.
சமைச்சதேயே திரும்ப சமைக்க போரடிக்கும் என்னை மாதிரி ஆளுங்களுக்கு
ரொம்பவே கஷ்டம். வெரைட்டியா சாப்பிடணும்னு சிலருக்கு இருக்கும். எனக்கு
வெரைட்டி வெரைட்டியா சமைக்க பிடிக்கும்.

தக்காளி சோறு செய்யலாம்னு ப்ளான்னு பக்கத்து வீட்டுக்காரங்க கிட்ட சொன்னேன்.
உடனே அவங்க ஒரு ரெசிப்பி சொல்லி செஞ்சு பாக்க சொன்னாங்க. அவங்களும்
என்னிய மாதிரி தான். சேம் ப்ளட். (வெரைட்டி சமைக்கும் கேசுங்க நாங்க)
சரி செஞ்சு பாக்கலாம்னு பாத்தா செம ருசி!! ஆஷிஷ் அம்ருதாவுக்கும்
ரொம்ப பிடிச்சு போச்சு. சரி சரி. மேட்டருக்கு வருவோம்.

தேவையான பொருட்கள்:

சமைத்த சோறு - 2 கப்
தக்காளி - 1/4 கிலோ,(கழுவி நீளவாக்கில் அரிந்து வைத்துக்கொள்ளவும்)
வெங்காயம் 1 அல்லது 2 (நீளவாக்கில் அரிந்து வைத்துக்கொள்ளவும்.
வேர்க்கடலை - 2 ஸ்பூன்,
கசகசா - 1 ஸ்பூன்,
வெள்ளை எள்ளு - 1 ஸ்பூன்.
காரம் - 1 அல்லது 1/2 ஸ்பூன்,
உப்பு - ருசிக்கேற்ப

தாளிக்க - கடுகு, உளுத்தம் பருப்பு, கடலைப்பருப்பு, கறிவேப்பிலை.

செய்முறை:

வாணலியில் முதலில் வேர்க்கடலை, எள்ளு, கசகசா தனித்தனியாக
போட்டு வறுத்து தனியே எடுத்து வைத்துக்கொள்ளவும். வேர்க்கடலை
தோல் நீக்கி எல்லாம் ஒன்றாக சேர்து கொஞ்சம் பேஸ்ட் போல
அரைத்து வைத்துக்கொள்ளவும்.

அதே வாணலியில் எண்ணெய் ஊற்றி தாளித்து வெங்காயம் போட்டு
நன்கு பொன்னிறம் ஆகும் வரை வதக்கி, தக்காளி சேர்த்து நன்கு
வதக்கவும். தக்காளி நன்கு வெந்தபின் உப்பு, காரம் சேர்த்து மேலும்
சில நிமிடங்கள் வதக்கவும். நன்கு வெந்ததும் அரைத்து வைத்திருக்கும்
விழுதை சேர்த்து நன்கு வதக்கி எண்ணெய் பிரிந்து வந்ததும்
சமைத்து வைத்திருக்கும் சாதத்தைப் போட்டு கலந்து கொத்துமல்லி
தூவி இறக்கினால் ரிச் தக்காளி சாதம் ரெடி!!!

சுடச்சுட சாப்பிட்டால்தான் ருசியே. தொட்டுக்கொள்ள வெங்காய ரய்தா,
சிப்ஸ் இருந்தால் ஜமாய்க்கலாம்!!

இந்த வகையில் சோறு உதிர் உதிராக இல்லாமல் கொஞ்சம் மெத்தென்று
இருக்கும். கொஞ்சமாக சாப்பிட்டாலும் போதும்.

பூண்டு ஊறுகாய் ஆந்திரா ஸ்டைல்

ரொம்ப நாளாக எப்பம்மா செய்யப்போறன்னு? ஆஷிஷ் கேட்டுகிட்டு இருந்தாப்ல.
தொணதொணப்பு ஜாஸ்தியாகி ஒரு வழியா செஞ்சு கொடுத்திட்டேன். :))
எங்க அப்பாவுக்கு பூண்டுன்னா ரொம்ப பிடிக்கும். ஆஷிஷும் அதே மாதிரிதான்.
பூண்டில் என்ன செஞ்சு கொடுத்தாலும் விரும்பி சாப்பிடுவான். அதிலும்
அவனுக்கு ரொம்ப பிடிச்சது பூண்டு குழம்பு/ பூண்டு ஊறுகாய்.

இந்த ஊறுகாய் போடுவது ரொம்ப சிம்பிள் (பூண்டு உரிப்பது ஒண்ணு தான்
கஷ்டம்). தேவையான பொருட்களை பாப்போம்.

உரித்த பூண்டு - 300 கிராம்,
மிளகாய்த்தூள் - 3/4 கப்,
உப்பு - 1/2 கப்
எலுமிச்சை ரசம் - 1 கப்
எண்ணெய் - 1 கப்
பெருங்காயம் - கொஞ்சமாக
கடுகு - 1/2 ஸ்பூன்
மஞ்சள் தூள் - சிட்டிகை.
வறுத்து பொடிக்க:
வெந்தயம் - 1/2 ஸ்பூன்,
சீரகம் - 1/2 ஸ்பூன்,
தனியா - 1/2 ஸ்பூன்,

செய்முறை பாப்போம்:

வெறும் வாணலியில் எண்ணெய் விடாமல் தனியா, சீரகம்,
வெந்தயம் தனித்தனியாக வறுத்து ஆறியதும் மிக்சியில் கொஞ்சம்
நர நரவென பொடித்துக்கொள்ளவும்.

பூண்டை தண்ணீர் விடாமல் குக்கரில் வைத்து ஸ்டீம் செய்து
எடுக்கவும். தண்ணீர் விடாமல் ரெண்டு விசில் விட்டால் கூட
போதும். வாணலியில் எண்ணெய் ஊற்றி காய்ந்ததும் கடுகு
சேர்த்து வெடித்ததும் பெருங்காயம், மஞ்சள் தூள் சேர்க்கவும்.

உடன் பூண்டு சேர்த்து நன்கு கலந்ததும், காரத்தூள், உப்பு,
பொடித்து வைத்திருக்கும் பொடி சேர்த்து உடன் அடுப்பை
அணைத்துவிடவும். நன்கு கிளறிவிட்டு எலுமிச்சை ரசத்தை
ஊற்றி கிளறவும். முதலில் மிக கெட்டியா இருக்கும். கொஞ்ச
நேரத்தில் எண்ணெய் பிரிந்து வந்து விடும்.

சுவையான, பூண்டு ஊறுகாய் ரெடி. காற்று புகாத பாட்டிலில்
போட்டு எடுத்து வைத்துக்கொள்ளவும். 3 மாதம் வரை கெடாது.
ஃபிரிட்ஜில் வைக்க வேண்டிய அவசியமில்லை.

இளைச்சவங்களுக்கு மட்டுமில்ல.........

அதென்னமோ தெரியலை. அப்படி ஒரு இளக்காரம். இல்லாடி
ஒரு பயம். சிலருக்கோ பிடிக்காது. அதனால இதை அதிகமா
உபயோகப்படுத்தவும் மாட்டாங்க. அப்படியே செஞ்சாலும்
பித்ரு காரியங்கள் எனப்படும் திவசம் அன்னைக்குத்தான் செய்வாங்க.
ஆனா இதுல இருக்கும் நலன்களை பத்தி தெரிஞ்சிக்கிட்டா நீங்களும்
கண்டிப்பா உணவுல சேத்துக்குவீங்க.

இந்த எள்ளைத் தாங்க சொல்றேன். கடலை உருண்டை சாப்பிடுவாங்க,
ஆனா எள்ளுருண்டைக்கு “நோ!”நோ”! தான். இதுல இன்னொரு
மேட்டரும் சொல்வாங்க யார் வீட்டுலயாவது எள்ளுருண்டை அல்லது
எள் சம்பந்த பட்டது சாப்பிட்டா அவங்களுக்கு நாம வேலை செஞ்சுக்
கொடுக்கணும். இதெல்லாம் மனசுல வெச்சுக்கிட்டு பலர் எள்ளை
தொடுவதே இல்லை.

தீவளிக்கு தீவளியாவது எண்ணெய் தேச்சு குளிக்கும் பொழுது
உபயோகிக்கப்படுவது நல்லெண்ணெய் தான். இதுலதான் மஹாலட்சுமி
இருப்பதாக புராணம் சொல்வது. நெய்க்கு அடுத்து பூஜைக்கு பயன்படுவது
நல்லெண்ணெய் தான். ஆயுர்வேதத்தில் எள்ளு மிகச் சிறப்பான இடம் இருக்கும்.
நல்லெண்ணையை தேய்த்து, மசாஜ் செய்து குளிப்பதால்
உடல் சூடு தணியும்.

சாம்பார் செய்யும் பொழுது ரீஃபைண்ட் ஆயில் உபயோகித்து தாளிப்பதற்கு
பதில் நல்லெண்ணெயில் தாளிதம் செய்தால்.... சாம்பார் வாசம்
வீசும். காரக்குழம்பு, வத்தக்குழம்பு, வெந்தயக்குழம்பு இதெல்லாம்
சாப்பிடும் பொழுது நல்லெண்ணெய் ஊற்றிக்கொண்டால் நல்ல ருசி + உடலுக்கும்
நல்லது. சுடச்சுட இட்லி அதன் மேல ஜோதிகா மாதிரி இல்லாட்டியும்
1 ஸ்பூன் நல்லெண்ணெய் ஊத்தி சாப்பிட்டா...... உடலுக்கும் நல்லது,
நாவுக்கும் நல்லா இருக்கும்.

வயிற்றுப்புண் அல்லது வாய்ப்புண் இருந்தால் முதல் கவளமாக
சூடான சோற்றில் நல்லெண்ணெய் + கொஞ்சம் உப்பு சேர்த்து பிசைந்து
சாப்பிட சரியாகும். ஊறுகாய்களுக்கும் நல்லெண்ணெய் தான் பெஸ்ட்.
எள்ளிலிருந்து கிடைக்கும் நல்லெண்ணெய்க்கு இவ்வளவு மருத்துவ
குணம் இருக்கும் பொழுது மூலமான எள்ளுக்கு எவ்வளவு சக்தி இருக்கும்.

ஆனா இளைச்சவங்களுக்கு எள்ளு, கொளுத்தவங்களுக்கு கொள்ளுன்னு
வசனம் சொல்லிட்டு எள்ளை தவிர்த்திடுவோம். கொள்ளையும் சாப்பிட
மாட்டோம். (குதிரைக்குத் தானே கொள்ளுன்னு சிலர் கிண்டல் செய்வாங்க)

எள்ளில் இரும்பு, மங்கனீசியம், காப்பர், கேல்சியம் ஆகிய சத்துக்கள்
இருக்கின்றன. விட்டமின் பி1, விட்டமின் இ ஆகியவையும் அடங்கி
இருக்கு. மூர்த்தி சிருசுன்னாலும் கீர்த்தி பெருசுன்னு சொல்றாப்ல
இந்தச் சின்ன வித்துக்குள் எவ்வளவு சக்தி கிடைக்குது பாருங்க.
எள்ளு கசப்பா இருக்கும் என்பதால பலர் அதை சாப்பிட மாட்டாங்க.
வெல்லம் சேர்த்து உருண்டை செய்யலாம். காரப்பொடி மாதிரி
செஞ்சு காய்கறில தூவி பிரட்டி எடுத்தா சுவையா இருக்கும்.
இட்லிப்பொடி செய்யும் போது அதுல சேத்துக்கலாம். திருநெல்வேலி
இட்லிப்பொடி சாப்பிட்டிருக்கீங்களா? எள்ளு வாசனையோட சூப்பரா
இருக்கும்.

பூப்படையும் பருவத்தில் இருக்கும் பெண் குழந்தைகளுக்கு எள்ளை
உணவில் சேர்த்துக்கொடுப்பதால நல்ல பலன் இருக்கும். பெண்களிலிருந்து
எல்லோரும் தினமும் இரண்டு உருண்டை சாப்பிடுவதால் (எள்ளு+ வெல்லம்
சேர்த்தது) உடம்புக்குத் தேவையான கால்சியம், இரும்புச்சத்து
சேர்ந்திடுது. ஆண்களுக்கும் கொடுக்கலாம். தவறே இல்லை.
கேன்சரை தடுக்கும் காரணிகள் எள்ளில் இருக்கு. கறுப்பு எள்ளு +
வெள்ளை எள்ளு இரண்டையும் சேர்த்து உருண்டை பிடித்து வைத்து
உட்கொண்டால் ரொம்பவும் நல்லது.

பெண்மையின் அழகுக்கு அழகு சேர்க்க உதவும் எள்ளு ஆண்மைக்கு
வளத்தையும், எனர்ஜியையும் தருகிறதுன்னு மருத்துவர்கள்
சொல்றாங்க.

மேலை நாடுகளில் ப்ரட்டில் எள்ளு போடுவார்கள். மெக்டொனால்ட்
ப்ரட்டில் பார்க்கலாம். நம் நாட்டில் மட்டுமில்லாமல் மேலை நாடுகளில்
கூட எள் சர்வ சாதரணமாக உபயோகிக்கப்படுகிறது.


இனியாவது எள்ளை உணவில் சேர்த்துக்கொள்வோம், ஆரோக்கியமான
வாழ்க்கை வாழ்வோம்.

சிம்பிளாக தக்காளித் தொக்கு

இது தக்காளி சீசன். 10 ரூபாய்க்கு 3 கிலோகூட கிடைக்கும்.
சூப்பாரா... வாயூறும்...அதே சமயம் சிம்பிளா தக்காளி
ஊறுகாய் செய்யலாமா!!! இது எதுக்கும் நல்ல காம்பினேஷன்.
சோற்றில் பிசைஞ்சுக்கலாம், சப்பாத்தி, தோசை, இட்லி, பூரிக்கு
நல்ல ஜோடி.

தக்காளி 1 கிலோ வாங்கி நல்லா கழுவி தண்ணி ஊத்தாம
குக்கரில் போட்டு 3 விசில் வரவெச்சு அடுப்பை அணைச்சிடணும்.
குக்கரில் ஸ்டீம் போனதும் திறந்து பார்த்தா தக்காளி வெந்தும்
தண்ணீரோட இருக்கும். அடுப்பை பத்த வெச்சு அதுல இந்தக்
குக்கரை வெச்சு தண்ணி சுண்டும் வரை ஸிம்மில் வெச்சு
கொதிக்க விடணும். அடி பிடிக்காக கிளறி விட்டுகிட்டே
இருக்கணும். தண்ணி நல்லா சுண்டினதும் தேவையான அளவு
காரம், உப்பு, மஞ்சள்தூள் போட்டு கலந்து விடணும். (விருப்ப
பட்டா 3 ஸ்பூன் கடுகை பொடி செஞ்சு அதுல தூவலாம், தக்காளி
ஆவக்காய் ஊறுகாய் ஆகிடும்)

ந.எ 1 பெரிய கரண்டி எடுத்து சூடு செஞ்சு அதுல பெருங்காயம்
சேர்த்து (கடுகு பொடிச்சு போடாட்டி) கடுகு 1 ஸ்பூன் போட்டு
வெடிக்க வெச்சு அதை கொதிக்கும் தக்காளிக் கலவையில்
கொட்டி இன்னும் கொஞ்ச நேரம் கொதிக்க விட்டு இறக்கினா
சுவையான தக்காளித் தொக்கு ரெடி....

ஸ்ஸ்ஸ்ஸ்ஸ்ஸ்..... தக்காளித் தொக்கு